جب اجالوں سے کوئی رات نکل آتی ہے ۔ نوید ملک

جب اجالوں سے کوئی رات نکل آتی ہے
چھوڑ کے شمع مضافات نکل آتی ہے

بھولی لڑکی ہے جو اس عہد کے بازاروں میں
پڑھ کے سعدی کی حکایات نکل آتی ہے

کوئی تدبیر نئے ہجر کی مشکل تو نہیں
جب بھی ہو اس سے ملاقات نکل آتی ہے

وہ تمنا جو چھپائی ہے غزل میں اکثر
لے کے لفظوں کی کرامات نکل آتی ہے

نہیں معلوم کہاں کس کا جنازہ پہنچے
ویسے تو گاؤں سے بارات نکل آتی ہے
.
تیرے دعوؤں سے شناور نہیں مانوں گا تجھے
پانی چڑھتا ہے تو اوقات نکل آتی ہے

کوئی تدبیر نئے ہجر کی مشکل تو نہیں
جب بھی ہوتی یے ملاقات نکل آتی ہے
۔
کسی درویش کی آنکھوں میں بسی ویرانی
دیکھنے شہر کے حالات نکل آتی ہے

آئینے! میں نے تعلق نہیں توڑا اب تک
تجھ سے لڑتے ہوئے ہر بات نکل آتی ہے

حاکمِ وقت کو ایسی ہی رعایا ہے پسند
لے کے ہاتھوں میں جو خیرات نکل آتی ہے

گھونسلہ ہے کسی خواہش کا مرے دل میں نوید
جب بھی سینے میں ہو برسات نکل آتی ہے

نوید ملک