نگاہِ دلربا بھی کیا غضب بیوپار کرتی ہے
جگر کا خوں بہاتی ہے دلوں پر وار کرتی ہے
کبھی توقیر جذبوں کی کبھی تحقیر الفت کی
کہیں مجروح و بیدم اور کہیں انگار کرتی ہے
دکھاتی ہے یہ خوابوں میں ستاروں سے ورا عالم
سرِ بازار پھر رسوائے عالم خوار کرتی ہے
چمن کے لالہ و گل میں محبت کی نمو بھر کر
سجا کر سولیاں خوشبو سپردِ دار کرتی ہے
حریمِ شب کا یہ میخانہ ء مستاں قیامت ہے
یہاں نینوں کی مستی وحشتیں بیدار کرتی ہے
یقیں کیا کیجئے کوکبؔ فریبی چشمِ قاتل کا
بنا کر ہمنوا رسوا سرِ بازار کرتی ہے
بحر ہزج مثمن سالم
مفاعیلن ۔۔ مفاعیلن ۔۔ مفاعیلن ۔۔ مفاعیلن
ہندسی اوزان ۔۔ 2221 ۔۔2221 ۔۔ 2221 ۔۔2221
اشارات تقطیع
نگاہے دل ۔۔ 2221 ۔۔ مفاعیلن
ر با بھی کیا ۔۔ 2221 ۔۔ مفاعیلن
غ ضب بوپا ۔۔ 2221 ۔۔ مفاعیلن
ر کر تی ہے ۔۔۔ 2221 ۔۔ مفاعیلن
ج گر کا خو ۔۔ 2221 ۔۔ مفاعیلن
ب ہاتی ہے ۔۔ 2221 ۔۔ مفاعیلن
د لو پر وا ۔۔ 2221 ۔۔ مفاعیلن
ر کر تی ہے ۔۔ 2221 ۔۔ مفاعیلن
